ԵՐԵՎԱՆ, ՕԳՈՍՏՈՍԻ 11, 24News
Օգոստոսի 9-ի գիշերը ոստիկանության Սիսիանի բաժնի քրեական հետախույզները, ձկան ապօրինի որս կատարելու կասկածանքով, Սիսիան քաղաքի Որոտան փողոցի շենքերից մեկի բակից բերման ենթարկեցին Գառնի գյուղի 43 եւ 28 տարեկան երկու բնակչի՝ «ՎԱԶ-21099» մակնիշի մեքենայով հանդերձ: Այս մասին տեղեկանում ենք Ոստիկանության լրատվության ծառայությունից։
Մեքենայի զննությամբ բեռնախցիկում հայտնաբերվեցին հոսանքահարող ինքնաշեն սարք, մարտկոց, ռետինե կոշիկներ, իսկ պլաստմասսե դույլի մեջ ՝ 127 ձուկ, որոնցից 120-ը` բեղլու, 7-ը՝ կարմրախայտ:
Ըստ բերման ենթարկված 43-ամյա տղամարդու` ձկները որսացել էին Տորունիք բնակավայրին հարակից Այրի գետից` հոսանքահարման եղանակով:
Մեքենան տեղափոխվել է ոստիկանության Սիսիանի բաժնի հատուկ պահպանվող տարածք:
Փաստի առթիվ նախապատրաստվում են նյութեր:
--00--ԱՀ