ԵՐԵՎԱՆ, ԴԵԿՏԵՄԲԵՐ 12, 24News
Առաջիկայում սփյուռքի նախարարությունը կդադարի գործել որպես գերատեսչություն, այն կկրճատվի՝ դառնալով արտաքին գործերի նախարարությանը կից կոմիտե։ Այդ մասին հայտնում են 24News-ի աղբյուրները։
Հիշեցնենք, որ Սփյուռքի նախարարությունը ձևավորվեց 2008 թվականին։ 10 տարի այն ղեկավարում էր Հրանուշ Հակոբյանը։ Իշխանափոխությունից հետո այդ պաշտոնը ստանձնեց Մխիթար Հայրապետյանը և ստացվում է, որ նա հասցրեց ղեկավարել 7 ամիս։ Հայրապետյանը շարունակելու է իր աշխատանքն Ազգային ժողովում՝ արդեն պատգամավորի կարգավիճակով։
Նշենք նաև, որ մնացյալ նախարարություններում էլ որոշակի վերափոխումներ են սպասվում։ Այդ մասին օպտիմալացման վերաբերյալ վերջին ասուլիսին՝ նոյեմբերի 20-ին, խոսել էր վարչապետի պաշտոնակատար Նիկոլ Փաշինյանը։ Նա նշել էր խորհրդարանական ընտրություններից հետո սպասվող կառավարության կազմի փոփոխության մասին՝ շեշտելով 17 նախարարություններից 5-ի հավանական կրճատման մասին։