ԵՐԵՎԱՆ, ՓԵՏՐՎԱՐԻ 27, 24News
Էրբիլում ՀՀ գլխավոր հյուպատոսության պաշտոնական բացման երկրորդ տարեդարձի կապակցությամբ գլխավոր հյուպատոսությունը փետրվարի 26-ին, Իրաքյան Քուրդիստանի մշակույթի և երիտասարդության հարցերով նախարարության հետ համատեղ, մշակույթի նախարարության գլխավոր սրահում կազմակերպել էր ՀՀ-ում բնակվող քուրդ, եզդի և ասորի ազգային փոքրամասնությունների մասին շուրջ 70 պատմական լուսանկարների և արխիվային փաստաթղթերի ցուցահանդես, որի պաշտոնական բացումին նախորդել է հայատառ քրդական ձեռագրերի, հայատառ քրդերեն տպագիր գրքերի մասին Մատենադարանի գիտաշխատող Գոռ Երանյանի ելույթ-պրեզենտացիան:
Ինչպես «Արմենպրես»-ը տեղեկանում է ՀՀ ԱԳՆ-ի տարածած հաղորդագրությունից, պատմական լուսանկարները և արխիվային փաստաթղթերը տրամադրվել էին ՀՀ Ազգային արխիվի, Մատենադարանի, Պատմության թանգարանի, Ե. Չարենցի անվան արվեստի և գրականության թանգարանի ու Արմենպրեսի կողմից:
Միջոցառմանը ներկա էին Իրաքյան Քուրդիստանի մի շարք բարձրաստիճան պաշտոնյաներ, մշակութային և քաղաքական գործիչներ, մտավորականներ, Էրբիլում հավատարմագրված դիվանագիտական առաքելությունների անդամներ, հայ, ասորի և եզդի համայնքների ներկայացուցիչներ:
Միջոցառման ընթացքում ելույթներով են հանդես եկել Իրաքյան Քուրդիստանի մշակույթի և երիտասարդության հարցերով նախարար Մուհամմադ Սաիդ Ալին, գլխավոր հյուպատոս Արշակ Մանուկյանը, ինչպես նաև ընթերցվել է այս կապակցությամբ ՀՀ ԿԳՄՍՆ նախարարի տեղակալ Արթուր Մարտիրոսյանի ողջույնի խոսքը:
Նախարար Մուհամմադ Սաիդ Ալին իր ելույթում նշել է, որ նման ցուցահանդեսի կազմակերպումը Էրբիլում իր տեսակով աննախադեպ է: Նա անդրադարձել է հայ-քրդական պատմական հարաբերություններին, Հայաստանի, հատկապես Խորհրդային Հայաստանի ունեցած կարևոր դերակատարությանը քրդական մշակույթի և ինքնության պահպանման գործում:
Նախարարը անդրադարձ է կատարել նաև իր՝ նախորդ տարի օգոստոսին Երևան այցին՝ հատուկ ընդգծելով, որ քրդական պատվիրակությունն այցելել է նաև Ծիծեռնակաբերդ՝ հարգանքի տուրք մատուցելու Հայոց ցեղասպանության անմեղ զոհերի հիշատակին:
Նշվում է, որ պատմական նշանակություն ունեցող նյութերի ցուցադրումը ևս մեկ անգամ ի ցույց է դրել Հայաստանի կարևոր դերակատարությունը քուրդ, եզդի, ասորի ժողովուրդների ինքնության և մշակույթի պահպանման գործում:
--00—ԶՀ