ԵՐԵՎԱՆ, ՍԵՊՏԵՄԲԵՐԻ 7, 24News
Թուրքիայի մայրաքաղաք Անկարայում գտնվող ԵՄ ընդլայնման հարցերով պատասխանատու Օլիվեր Վարհեի հետ է հանդիպել Թուրքիայի ԱԳ նախարար Հաքան Ֆիդանը։ Օրակարգային է եղել սիրիական խնդիրը, որի վերաբերյալ էլ համատեղ մամլո ասուլիսի ընթացքում, լրագրողների հարցերին պատասխանելով, Ֆիդանը նշել է, որ տարածաշրջանում արաբներին, հատկապես «YPG-ի ձեռքով» (Սիրիայի քրդական ինքնապաշտպանական ուժեր) ճնշելու քաղաքականությանը պետք է վերջ տրվի։ Հայտնում է Ermenihaber.am-ը։
«Եթե այս ամենը չավարտվի, սա միայն սկիզբն է, որ մենք տեսնում ենք: Մեր տարածաշրջանի համար ավելի վտանգավոր սցենարներ կանխատեսելն անխուսափելի է»,- ասել է Ֆիդանը։
Թուրքիայի առաջին դիվանագետը մեղադրել է ԱՄՆ-ին տարածաշրջանում լարվածություն առաջացնելու համար։
«Սակայն երկար տարիներ կպահանջվեն բուժելու ապստամբության սերմերը, որոնք և՛ ԱՄՆ-ը, և՛ YPG-ն միասին ցանել են քրդերի և արաբների միջև: Արաբների, թուրքերի, քրդերի, բոլորի համար կարևոր է ապրել այնտեղ, որտեղ գտնվում են։ Մենք վաղուց կանխատեսում էինք, որ նման նախաձեռնություններ կսկսվեն, քանի որ ԱՄՆ-ի կողմից աջակցվող YPG-ն ներխուժել է արաբական հողեր և արդյունքում նրանց ստրկացրել»,- ասել է Հաքան Ֆիդանը։
--00—ՅՄ