ԵՐԵՎԱՆ, ՀՈԿՏԵՄԲԵՐ 28, 24News
ՊՆ նախկին նախարար Վիգեն Սարգսյանի անունը շոշափող քրեական գործի շրջանակներում որևէ մեկին մեղադրանք չի առաջադրվել և Վիգեն Սարգյանը որպես մեղադրյալ ներգրավված չէ։ Այս մասին «Փաստինֆո»-ի հետ զրույցում ասաց ՀՀ ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը։
Հիշեցնենք, որ քրեական գործի մասին հայտնի դարձավ սեպտեմբերի 25-ին, երբ քննչական կոմիտեն հայտարարեց, որ «ՀՀ պաշտպանության նախարարության համակարգի զինծառայողների բնակարանային ապահովման մասին» ՀՀ կառավարության 07.03.2007թ. N 384-Ն որոշմամբ սահմանված կարգի խախտումներով կատարելու դեպքի առթիվ քննվող քրեական գործով տվյալներ են ձեռք բերել ՀՀ պաշտպանության նախկին նախարար Վ.Սարգսյանին որպես մեղադրյալ ներգրավելու համար ու գործն ուղարկվել է ՀՔԾ։
Սակայն քրեական գործը մի քանի օր ՀՔԾ-ում քննվելուց հետո՝ հոկտեմբերի 4-ին դատախազը պահանջեց քրեական գործը եւ նորից ուղարկեց հետ՝ քննչական կոմիտե։
Նշենք, որ ՀՀ քրեական դատավարության օրենսգրքի 190-րդ հոդվածի համաձայն՝ Հայաստանի Հանրապետության օրենսդիր, գործադիր և դատական իշխանության մարմինների ղեկավար աշխատողների, պետական ծառայություն իրականացնող անձանց` իրենց պաշտոնեական դիրքի կապակցությամբ հանցակցությամբ կամ նրանց կատարած հանցագործությունների գործերով նախաքննությունը կատարվում է հատուկ քննչական ծառայության քննիչների կողմից։
Հիշեցնենք, որ, ըստ ՔԿ պաշտոնական հաղորդագրության, քրեական գործը հարուցվել է ՀՀ քրեական օրենսգրքի 308-րդ հոդվածի 1-ին մասով և 309-րդ հոդվածի 1-ին մասով նախատեսված հանցագործությունների հատկանիշներով՝ ՀՀ ՊՆ և ՀՀ ԶՈՒ համապատասխան պաշտոնատար անձանց կողմից իրենց պաշտոնեական լիազորությունները չարաշահելու և պաշտոնեական լիազորություններն անցնելու՝ 2018թ. հունվարին Երևան քաղաքի Գ.Հասրաթյան փողոցի թիվ 25/6 բազմաբնակարան շենքի բնակարանների հատկացումները «ՀՀ պաշտպանության նախարարության համակարգի զինծառայողների բնակարանային ապահովման մասին» ՀՀ կառավարության 07.03.2007թ. N 384-Ն որոշմամբ սահմանված կարգի խախտումներով կատարելու դեպքի առթիվ։ Թե որն է առանց մեղադրանք առաջադրելու ՀՔԾ-ից քրեական գործը նորից քննչական կոմիտե հետ ուղարկվելու պատճառը՝ իրավասու մարմինները չեն մանրամասնում։ծ
Աղբյուրը՝ «Փաստինֆո»։