ԵՐԵՎԱՆ, ՀՈԿՏԵՄԲԵՐԻ 10, 24News
Իրանը ողջունում է Լեռնային Ղարաբաղում Ադրբեջանի ու Հայաստանի միջև մարտական գործողությունների դադարեցումը, ինչպես խաղաղությանն ուղղված քայլ։ Այս մասին IRNA գործակալության հաղորդմամբ՝ հայտնել է Իրանի ԱԳ նախարար Մոհամե Ջավադ Զարիֆը։
«Մենք մեր հարևաններ Ադրբեջանին ու Հայաստանին երկխոսության կոչ ենք անում, որը հիմնված կլինի միջազգային իրավունքների և տարածքային ամբողջականության վրա»,- ասել է իրանցի ԱԳ նախարարը։
Հիշեցնենք, որ անտեսելով հոկտեմբերի 10-ի՝ ժամը 12:00-ից մարդասիրական նպատակներով հայտարարված կրակի դադարեցումը, ադրբեջանական ստորաբաժանումները 12:05-ին գրոհ են ձեռնարկել «Կարախամբեյլի» կոչվող տեղամասի ուղղությամբ։ Արցախի ՊԲ ստորաբաժանումները դիմում են համապատասխան միջոցների՝ կասեցնելու հակառակորդի գրոհը։
Սեպտեմբերի 27-ի վաղ առավոտյան Ադրբեջանը, խախտելով բոլոր միջազգային պարտավորվածությունները, թուրքական բանակի և Մերձավոր Արևելքից բերված ահաբեկիչների անմիջական մասնակցությամբ հարձակում է գործել Արցախի ուղղությամբ։ Այդ ընթացքում բազմիցս հրետակոծվել են թե՛ Արցախի և թե՛ Հայաստանի բնակավայրերը, խաղաղ բնակչության շրջանում կան բազմաթիվ զոհեր ու վիրավորներ, ավերվել են տասնյակ շինություններ, ահռելի վնաս է հասցվել քաղաքացիական ենթակառուցվածքներին։
Հայկական Զինված ուժերը հերոսական ու համառ մարտեր են մղում հակառակորդի դեմ՝ պատճառելով նրան կենդանի ուժի և տեխնիկայի ծանրագույն կորուստներ։
--00—ՄՀ