ԵՐԵՎԱՆ, ՀՈՒՆԻՍԻ 20, 24News
Փոխվարչապետ Տիգրան Խաչատրյանն ընդունել է ՄԱԿ-ի զարգացման ծրագրի հայաստանյան գրասենյակի մշտական ներկայացուցիչ Նաթիա Նացվլիշվիլիին:
Ընդգծելով կայուն զարգացման նպատակների կարևորությունը երկկողմ համագործակցության օրակարգի շրջանակներում՝ կողմերը մտքեր են փոխանակել այս ուղղությամբ իրականացվող ընթացիկ և հեռանկարային ծրագրերի վերաբերյալ: Մասնավորապես՝ երկուստեք կարևորվել է սահմանամերձ համայնքների դիմադրողականության բարձրացմանը և սոցիալ-տնտեսական զարգացմանը, «կանաչ» տնտեսական օրակարգի առաջմղմանը, ինչպես նաև առողջապահական, կրթական և բնապահպանական ենթակառուցվածքների զարգացմանն ուղղված համագործակցությունը:
Հանդիպման ընթացքում փոխվարչապետ Խաչատրյանն ընդգծել է Լեռնային Ղարաբաղում միջազգային, այդ թվում՝ ՄԱԿ գործակալությունների՝ տեղում ներգրավման կարևորությունը՝ ստեղծված իրավիճակին ծանոթանալու և բնակչության հումանիտար խնդիրները հասցեագրելու նպատակով։ ՄԱԶԾ հայաստանյան գրասենյակի մշտական ներկայացուցիչն, իր հերթին, մտահոգություն է հայտնել ստեղծված իրավիճակի վերաբերյալ՝ պատրաստակամություն հայտնելով շարունակելու ՀՀ սահմանամերձ համայնքների վերականգնմանն ուղղված աջակցության տրամադրումը։
Նաթիա Նացվլիշվիլին վերահաստատել է Հայաստանի ընթացիկ բարեփոխումների օրակարգին աջակցելու պատրաստակամությունը՝ կարևորելով նախանշված ուղղություններով համագործակցության ընդլայնման անհրաժեշտությունը:
--00--ԶՀ