ԵՐԵՎԱՆ, ԱՊՐԻԼԻ 22, 24News
Իրավապաշտպան Զառա Հովհաննիսյանը գրառում է արել ֆեյսբուքյան էջում՝ անդրադառնալով Շուռնուխի նախկին վարչական ղեկավարի՝ ՔԿ բերման ենթարկվելու տեսանյութին՝ ընդգծելով, որ բերման ենթարկելիս հաշվի չի առնվել անձի առողջական վիճակը։
«Խախտում եմ լռությունս․
Վերջին ժամանակահատվածում փորձում էի լռել, քանի դեռ քաղաքական խմբավորումները զբաղվում են աթոռակռվով և մանիպուլյացիաներով։ Սակայն չեմ կարող լռության մատնել ՀՀ ոստիկանության կողմից անմարդկային վերաբերմունքը սյունեցիների նկատմամբ, ինչպես նաև բերման ենթարկելիս «Ոստիկանության մասին» օրենքի ակնհայտ խախտումներին։
Մանրամասն դիտելով «Ինչպե՞ս են Շուռնուխ համայնքի ղեկավարի եղբորը ծնկաչոք քարշ տալիս Քննչական կոմիտե» վերտառությամբ տեսանյութը, ուզում եմ մատնանշել մի քանի խախտումներ, որոնք ակնհայտ երևում են։
Մասնավորապես տեսանյութից երևում է, թե ինչպես են իրավապահները Քննչական կոմիտե տեղափոխում Շուռնուխ համայնքի ղեկավարի եղբորը՝ Արարատ Աղաբեկյանին։ Վերջինը եղել է նաև պատերազմի մասնակից, և տեսանյութում հայտնում է այն մասին, որ հիվանդ պառկած է եղել։ Փաստացի բերման ենթարկելիս հաշվի չի առնվել անձի առողջական վիճակը, ավելին, նրան բերման են ենթարկել ձեռնաշղթաներով։
Նշեմ, որ ձեռնաշղթաները դրանք հատուկ միջոցներ են, որոնք կիրառվում են «Ոստիկանության մասին» օրենքի 31-րդ հոդվածի համապատասխան դրույթի, այն է՝ հանցագործություն կատարող կամ կատարած անձանց հատնաբերելիս, այն դեպքերում, երբ նա ցուցաբերում է դիմադրություն, հանցագործության վայրից փորձում է փախուստի դիմել կամ ինքն իրեն կամ շրջապատին կարող է վնաս պատճառել։
Տեսանյութից ակնհայտ երևում է, որ Արարատ Արշակյանը բերման ենթարկվելիս ուժասպառ է, նույնիսկ ոտքի վրա կանգնել չի կարողանում, ուստի չի կարող նաև փախուստի դիմել կամ դիմադրել։ Այդ է վկայում նաև այն հանգամանքը, որ քննչական սենյակում նկարահանում կատարելու պահին ոսստիկանության աշխատակիցները հանում են ձեռնաշղթաները, և բերման ենթարկվածն ուժասպառ հենվում է սեղանին։ Եթե կարող էին հանել տեսախցիկի առջև, ինչո՞ւ չեն փորձել ճիշտ գնահատել իրավիճակն ու հանել ձեռնաշղթաները ավելի շուտ։
Այնուհետ, բերման ենթարկվածի ինքնազգացողության վերաբերյալ Գայանե Պապոյանի հարցին ի պատասխան անձը խնդրում է շտապօգնություն կանչել, սակայն քննչական գործողություններ իրականացնողները ոչ հարցրել էին, ոչ էլ մինչ այդ փորձել էին բժշկական օգնություն ցուցաբերել առողջական խնդիր ունեցող քաղաքացուն։
Սա լուրջ խախտումներ են, որոնք համակարգային բռնության հստակ դրսևորումներ են»։
--00—ԼՄ