ԵՐԵՎԱՆ, ՀՈԿՏԵՄԲԵՐԻ 15, 24News
Եգիպտոսի նախագահ Աբդել Ֆաթահ ալ-Սիսին հայտարարել է, որ Եգիպտոսը դեմ է պաղեստինցիների վերաբնակեցմանը Գազայի հատվածից Սինայի թերակղզում: Հայտնում է Ամերիկայի Ձայնը։
Հաղորդվում է, որ շաբաթ օրը Եգիպտոսն ու Իսրայելը պայմանավորվել են բացել Ռաֆահի սահմանային անցակետը, որպեսզի ԱՄՆ քաղաքացիները լքեն Գազայի հատվածը: Դեռևս համաձայնություն ձեռք չի բերվել Գազայի մյուս բնակիչներին Եգիպտոս մուտք գործելու թույլտվության վերաբերյալ։
Հինգշաբթի օրը Սիսին ասել է, որ պաղեստինցիները պետք է դիմադրեն իրենց տարածքը լքելու ստիպողական փորձերին: Նա նշել է, որ Պաղեստինի հարցը թանկ է բոլոր արաբների համար, և որ պաղեստինցիները պետք է ամուր մնան իրենց հողի վրա։
Այս շաբաթվա սկզբին իսրայելական բանակի խոսնակ, փոխգնդապետ Ռիչարդ Հեխտը կոչ էր արել Գազայի պաղեստինցիներին լքել հատվածը և մեկնել Եգիպտոս: Ավելի ուշ Իսրայելի պաշտպանության բանակը հայտարարություն է տարածել, որում ասվում է, որ Իսրայելը «պաշտոնապես կոչ չի արել» Գազայի բնակիչներին լքել գոտին:
Եգիպտոսի խորհրդարանի անդամ Մուստաֆա Բաքրին շաբաթ օրը սաուդյան Al Arabiya հեռուստաալիքին ասել է, որ Եգիպտոսը «նախազգուշացրել է Իսրայելին և միջազգային այլ կողմերին, որ պայքարելու է Սինայի թերակղզում պաղեստինցիներին վերաբնակեցնելու ցանկացած փորձի դեմ»։ Նա հայտարարեց Եգիպտոսի տարածքը որպես պաղեստինյան նոր հայրենիքի մաս օգտագործելու տասնամյակների վաղեմություն ունեցող ծրագրի մասին: Փարիզի համալսարանի քաղաքագետ Խաթթար Աբու Դիաբը «Ամերիկայի ձայնին» ասել է, որ Եգիպտոսի նախկին նախագահ Հոսնի Մուբարաքը պնդում էր, թե Իսրայելը, իբր, պլանավորում է վերաբնակեցնել պաղեստինցիներին Սինայում՝ Եգիպտոսի պարտքի մի մասը ներելու դիմաց, որն այժմ գնահատվում է մոտ 170 մլրդ դոլար:
Մանրամասն՝ սկզբնաղբյուր կայքում։
--00—ՅՄ