ԵՐԵՎԱՆ, ՍԵՊՏԵՄԲԵՐԻ 24, 24News
«Անվտանգության ծառայության պետն իմ ընկերն է, իր հետ ճանապարհ ենք անցել. իմ ընկերն էլ մնալու է»,- սեպտեմբերի 24-ին պատասխանելով լրագրողների հարցերին՝ ասել է «Երկրապահ» կամավորական միության վարչության նախագահ, «Իմ քայլը» խմբակցության պատգամավոր Սասուն Միքայելյանը: «Մեր գերխնդիրն այսօր մեր համախմբվելն է»,- նշել է նա:
Սասուն Միքայելյանի խոսքով՝ Վանեցյանի հայտարարությունները բոլորի համար սթափվելու և համախմբվելու նշանակություն պիտի ունենան: Նրա հավաստմամբ՝ հայկական զինուժը նախկինում էլ ադրբեջանցիներին հաղթել է անհավասար թվաքանակով:
«Հաղթել ենք, ազատագրել ենք, հեռացրել ենք վտանգը Արցախի ժողովրդից, բուֆերային զոնա է ստեղծվել»,- ասել է նա:
Ի պատասխան Վանեցյանի՝ հրապարակային հայտարարություններով սպայի ուսադիրներն աղբանոցը նետելու՝ վարչապետ Փաշինյանի դիտարկման մասին հարցին՝ Միքայելյանն ասել է. «Ես էլ եմ ուսադիրներ կրում, նման բան ոչ ոք իրավունք չունի»: