ԵՐԵՎԱՆ, ԴԵԿՏԵՄԲԵՐ 14, 24News
Հայաստանի ոստիկանապետ Վալերի Օսիպյանի եղբորորդու՝ Սեդրակ Օսիպյանի մասնակցությամբ 2014 թվականին տեղի ունեցած դանակահարության գործը երբեք փակված չի եղել, որ վերաբացվի։ Այդ մասին 24News-ի հետ զրույցում նշեց քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը։ Հիշեցնենք, որ մամուլում տեղեկություն է տարածվել, համաձայն որի՝ գործի հետ կապված նոր հանգամանքներ են ի հայտ եկել, Վալերի Օսիպյանի եղբորորդու կողմից դանակահարվածը 4 տարի անց հրաժարվել է ցուցմունքից, որի արդյունքում գործը վերաբացվել է։
Խոսքը 2014թ. հունիսի 1-ի գիշերը Նուբարաշենում տեղի ունեցած դանակահարության դեպքի մասին է, որի համար կասկածվում է Սեդրակ Օսիպյանը: Դանակահարված երիտասարդը ծանր մարմնական վնասվածքներ էր ստացել և զրկվել էր փայծաղից:
Դեպքի առթիվ հարուցվել էր քրեական գործ։ Երևանի Էրեբունի և Նուբարաշեն վարչական շրջանների ընդհանուր իրավասության դատարանը բավարարել էր Երևանի փոխոստիկանապետ Վալերի Օսիպյանի եղբորորդու խափանման միջոց կալանավորումն ընտրելու միջնորդությունը: 22-ամյա Սեդրակ Օսիպյանի նկատմամբ հայտարարվել էր հետախուզում: Որոշ ժամանակ անց դատախազությունը բավարարել էր Օսիպյանի փաստաբան Կրոմվել Գրիգորյանի միջնորդությունը․Սեդրակ Օսիպյանի նկատմամբ որպես խափանման միջոց ընտրվել էր ստորագրություն չհեռանալու մասին։ 9 ամիս հետախուզման մեջ գտնվելուց հետո Սեդրակ Օսիպյանը ներկայացել էր քննիչին։
Քննչական կոմիտեից հայտնեցին, որ այս քրեական գործը երբեք չի կարճվել, հետևաբար չէր կարող վերաբացվել։
«Գործը պետք է կարճվի կամ կասեցվի, որ վերաբացվի, մինչդեռ այս գործը երբեք փակված չէր, միշտ ընթացքի մեջ է եղել։ Պարզապես, որոշ ժամանակ այդ գործով որևէ մեկին չեն հրավիրել հարցաքննության։ Նախաքննությամբ ընդունված է, որ ցանկացած պահի, թեկուզ որոշակի տևական դադարից հետո յուրաքանչյուր մարդու գործով կարող են կանչել հարցաքննության»,- նշեց Նաիրա Հարությունյանը։
Ըստ նրա՝ այս պահին գործը նախաքննության փուլում է։ Նա այլ մանրամասներ հրաժարվեց ներկայացնել՝ նախաքննության շահերից ելնելով։