ԵՐԵՎԱՆ, ՀՈՒՆՎԱՐ 18, 24News
ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը հունվարի 18-ին ընդունել է իտալական «Ռենկո» ընկերության գլխավոր գործադիր տնօրեն Ջովաննի Ռուբինիին:
Նախարարությունից հայտնում են, որ հանդիպման ընթացքում Ջովաննի Ռուբինին ներկայացրել է Երևանում նոր ՋԷԿ-ի կառուցման ծրագրով իրականացված աշխատանքների վերաբերյալ տեղեկատվություն` գոհունակություն հայտնելով ՀՀ կառավարության հետ համագործակցությունից:
Ջովաննի Ռուբինիին նշել է, որ ծրագրով նախատեսված աշխատանքներն ընթանում են սահմանված ժամանակացույցին համապատասխան և առանց խոչընդոտների:
«Ռենկո» ընկերության գլխավոր գործադիր տնօրենը հավաստիացրել է, որ շուտով կավարտվի ծրագրի ֆինանսական ամփոփումը եւ կտրվի էլեկտրակայանի շինարարական աշխատանքների մեկնարկը:
Նախարարի պաշտոնակատար Գարեգին Բաղրամյանը կարևորել է նոր ջերմաէլեկտրակայանի կառուցման աշխատանքների պատշաճ իրականացումն ու սահմանված ժամկետների պահպանումը:
Նշենք, որ 250 մլն ԱՄՆ դոլար արժողությամբ նոր ՋԷԿ-ի կառուցման ներդրումային ծրագիրն իրականացվում է իտալական «Ռենկո», իտալական պետական «Սիմեստ» եւ գերմանական «Սիմենս» ընկերությունների հետ համագործակցության շնորհիվ: Այն հնարավոր կլինի ավարտել 26 ամսվա ընթացքում եւ շահագործման կհանձնվի 250 մեգավատ հզորությամբ ջերմաէլեկտրակայան, որի էներգիայի արժեքը, այլ ջերմաէլեկտրակայանների համեմատ, կլինի ամենացածրը՝ 27,4 դրամ 1 կվտժ-ի համար: Շինարարության մեջ ներգրավված է լինելու 1000-1200 մարդ, իսկ շահագործումից հետո ստեղծվելու են 230 աշխատատեղեր։