ԵՐԵՎԱՆ, ՓԵՏՐՎԱՐԻ 12, 24 News
Միացյալ Նահանգները պատրաստվում է տարհանել Կիևում իր դեսպանության աշխատակիցներին: «Արմենպրես»-ի հաղորդմամբ, այս մասին հայտնում է Associated Press-ը՝ հղում անելով իր աղբյուրներին:
Լրատվական գործակալության տվյալներով՝ ԱՄՆ պետդեպարտամենտը փետրվարի 12-ին հայտարարելու է այն մասին, որ դիվանագիտական ներկայացուցչության բոլոր աշխատակիցները պետք է լքեն Ուկրաինան՝ կապված այդ երկիր Ռուսաստանի կողմից նախապատրաստվող հնարավոր ներխուժման հետ:
ԱՄՆ արտաքին քաղաքական գերատեսչությունից ՏԱՍՍ-ին դեռևս չեն պատասխանել թեմայի հետ կապված հարցմանը:
Associated Press-ի աղբյուրի տեղեկությամբ՝ ամերիկացի փոքրաքանակ դիվանագետների խումբը կարող է մնալ երկրում, սակայն նրանք տեղափոխվելու են դեպի Արևմուտք՝ Ուկրաինայի ու Լեհաստանի սահման:
Ավելի վաղ ԱՄՆ նախագահի՝ ազգային անվտանգության հարցերով խորհրդական Ջեյք Սալիվանը հայտարարել էր, որ ԱՄՆ-ն կրճատելու է Ուկրաինայում իր դեսպանության անձնակազմը: Նա նաև կոչ էր արել այդ երկրում գտնվող ամերիկացիներին առաջիկա 24-48 ժամերի ընթացքում հնարավորինս շուտ լքել Ուկրաինան:
--00—ՄՀ