ԵՐԵՎԱՆ, ԴԵԿՏԵՄԲԵՐԻ 23, 24News
Արցախից առայժմ մեկ հիվանդ է Կարմիր խաչի միջնորդությամբ տեղափոխվել Հայաստան։ Ինչպես «Փաստինֆո»-ին հայտնեց ԿԽՄԿ հայաստանյան գրասենյակի հաղորդակցման ծրագրերի ղեկավար Զառա Ամատունին՝ նրան տեղափոխել են Արցախից ստացված դիմումի հիման վրա։
«Մշտական կապի մեջ ենք թե՛ Արցախի, թե՛ Հայաստանի իշխանությունների հետ։ Տեղեկացրել ենք մեր հնարավորությունների մասին, բայց կարիքների գնահատումն ու առաջնահերթությունները սահմանում են տեղական մարմինները։ Մենք ընդամենը, համապատասխան դիմումների հիման վրա, կարող ենք միջնորդել, որ այս կամ այն հարցը լուծվի», - ասաց Ամատունին։
Արցախից այլ հարցով օգնության պահանջ ԿԽՄԿ հայաստանյան գրասենյակը չի ստացել։
Ադրբեջանցիների կողմից Հայաստանն Արցախին կապող միակ ճանապարհի արգելափակման պատճառով տուն վերադառնալ չկարողացող արցախցիներից ևս ԿԽՄԿ-ն նամակ կամ դիմում չի ստացել։
Հայաստանում մնացած արցախցիների կարիքների բավարարմամբ հիմնականում զբաղվում են ՀՀ իշխանությունները, բայց մենք նրանց հետ կապի մեջ ենք՝ հասկանալու համար, թե ինչով կարող ենք օգնել։ Առայժմ միայն ժամանցային, հոգեբանական աջակցություն ենք ցուցաբերել այստեղ մնացած երեխաներին։ Գորիսի մեր գրասենյակն անմիջական կապի մեջ է ԼՂ՝ այնտեղ մնացած բնակիչների հետ», - ասաց Ամատունին։
Մանրամասները՝ սկզբնաղբյուրում։
--00—ՅՄ