ԵՐԵՎԱՆ, ՀՈՒԼԻՍԻ 21, 24News
Մոսկվան վստահ է, որ Երևանի և Բաքվի միջև հարաբերությունները կկարգավորվեն։ Այս մասին այսօր լրագրողներին ասել է ՌԴ փոխարտգործնախարար Սերգեյ Ռյաբկովը, գրել է ՌԻԱ Նովոստին, փոխանցում է Sputnik Արմենիան։
«Մենք միանգամայն վստահ ենք, որ Հայաստանում և Ադրբեջանում քաղաքական գործիչները խելամիտ և պատասխանատու են մոտենում այն դիրքորոշմանը, որը Ռուսաստանը առաջ է քաշում բոլոր փուլերում: Կարծում եմ, որ մեր ջանքերը կբերեն ցանկալի արդյունքի, և նրանք կհասնեն կարգավորման»,- ասել է նա։
Բարձրաստիճան դիվանագետը նաև ընդգծել է, որ ռուսական կողմը, ի տարբերություն Արևմուտքի, Հայաստանի և Ադրբեջանի հակամարտությունում փնտրում է միայն «կայուն կարգավորման բանաձև» և աշխատում է երկու կողմերի համար հասկանալի օրակարգով։ «Մենք չէինք ցանկանա, որ մեր առաջարկներում որևէ մեկը տեսներ աշխարհաքաղաքական մրցակցության տարր, այսպես կոչված, հավաքական Արևմուտքի հետ»,- հավելել է նա։
ՌԴ փոխարտգործնախարարը նշել է, որ պատրաստ են օգնել կողմերին գտնել այն կետը, որտեղ շահերը մերձենում են, և որտեղ արդյունքը կարող է լինել համաձայնագրի տեսքով։
Խոսելով Ղարաբաղի շուրջ ստեղծված հումանիտար իրավիճակի մասին`Ռյաբկովը մատնանշել է, որ Ռուսաստանն արել և անելու է հնարավոր ամեն ինչ ճգնաժամի հումանիտար հետևանքները նվազագույնի հասցնելու համար։ «Հնարավորություններն անսահմանափակ չեն, ռեսուրսները պետք է բաշխվեն ըստ առաջնահերթությունների, բայց այս թեման մեր տեսադաշտում է, մենք դրանով կզբաղվենք»,- եզրափակել է բարձրաստիճան դիվանագետը։
--00—ՍՊ