ԵՐԵՎԱՆ, ՆՈՅԵՄԲԵՐԻ 10, 24News
Քրեական ոստիկանության գլխավոր վարչության ծառայողները հետախուզվողի վերաբերյալ տեղեկությունն իրացրին Սիսիանի ոստիկանների հետ: Հենց Սիսիանի բաժնի կողմից էր այս տարվա հուլիսի 14-ից հետախուզվում երևանցի 23-ամյա երիտասարդը, խափանման միջոցը` կալանք:
Նոյեմբերի 9-ին սպանության փորձի մեղադրանքով հետախուզվող երիտասարդը հայտնաբերվեց մայրաքաղաքի Շիրվանզադեի փողոցի մի բնակարանում, ձերբակալվեց ու ներկայացվեց նախաքննական մարմին:
Իսկ դեպքը տեղի էր ունեցել հուլիսի 9-ին, Սիսիանում: Ժամը 19.30-ին Իսրայելյան-Խանջյան փողոցների խաչմերուկում տեղի էր ունեցել վթար. մի սիսիանցու վարած «Նիսանը» բախվել էր Անգեղակոթ գյուղի մի բնակչի «ՎԱԶ-21043» մակնիշի մեքենային:
Վթարի վայրում մարդիկ էին հավաքվել, և սկսվել էր վեճ, որը վերաճել էր խուլիգանության: Հնչել էին հայհոյանքներ, խախտվել էր հասարակական կարգը:
Այդ ընթացքում վիճողներին էր մոտեցել նաև մայրաքաղաքի 23-ամյա բնակիչը, որը, խուլիգանական դրդումներով, կյանքից զրկելու դիտավորությամբ, սուր կտրող-ծակող գործիքով վնասվածքներ էր պատճառել անգեղակոթցի վարորդին ու նրա եղբորը, նաև վիճողներին բաժանող մի քաղաքացու:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
--00—ՅՄ