ԵՐԵՎԱՆ, ՆՈՅԵՄԲԵՐԻ 13, 24News
Նախարար Վահան Քերոբյանը Ճապոնիա կատարած այցի շրջանակում նոյեմբերի 13-ին հանդիպում է ունեցել Ճապոնիայի արտաքին առևտրի կազմակերպության (JETRO) նախագահ և գլխավոր գործադիր տնօրեն Նորիհիկո Իշիգուրոյի հետ: Հանդիպմանը ներկա էին նաև Ճապոնիայում ՀՀ արտակարգ և լիազոր դեսպան Արեգ Հովհաննիսյանը և ՀՀ էկոնոմիկայի նախարարի տեղակալ Նարեկ Տերյանը:
Հանդիպման ընթացքում կողմները քննարկել են հայ-ճապոնական տնտեսական հարաբերությունների զարգացմանն ու առևտրաշրջանառության ծավալների մեծացմանն ուղղված գործնական հարցեր:
Վահան Քերոբյանը ներկայացրել է Հայաստանի ներդրումային գրավչությունը, գործարարությամբ զբաղվելու դյուրին պայմաններն ու օրենսդրությունը և ընդգծել այս ամենի մասին ճապոնացի գործարարների իրազեկվածությունը բարձրացնելու անհրաժեշտությունը:
Կողմերն անդրադարձել են հայ-ճապոնական առևտրատնտեսական հարաբերություններին առնչվող մի շարք հարցերի և պայմանավորվել հետամուտ լինել ձեռքբերված պայմանավորվածությունների կատարման ընթացքին:
--00—ԼՀ