ԵՐԵՎԱՆ, ՀՈՒՆՎԱՐԻ 22, 24News
ՀՀ ՆԳՆ ոստիկանության պետական պահպանության գլխավոր վարչության շնավարժարանի շները 2023-ին մասնակցել են ոստիկանական 1027 գործողության։ Այս մասին տեղեկացրին ՀՀ ներքին գործերի նախարարությունից՝ ներկայացնելով ոստիկանության կինոլոգիական ծառայության զարգացման ծրագրերը։
Հաղորդագրության մեջ ասվում է. «Կատրինն ու Գոռն ընդամենը չորս ամսվա ընկերներ են։ Չորքոտանի բարեկամը ավագ ենթասպա Գոռ Մանգասարյանի հետ Հայաստան է եկել վերապատրաստված և պատրաստ ծառայելու։
2023-ին ոստիկանության պետական պահպանության գլխավոր վարչության շնավարժարանի շները մասնակցել են ոստիկանական 1027 գործողության: Այս ծառայությունում ընթացող բարեփոխումների, կարողությունների և հնարավորությունների զարգացման նպատակը նախևառաջ ոստիկանական աշխատանքի արդյունավետությունը բարձրացնելն է, հանրային անվտանգության ապահովումը:
Այսօր շների թիվն ավելի շատ է, և բոլորն էլ պատրաստ են աջակցելու հանցագործությունների բացահայտմանը։ Բնատուր սուր լսողությունն ու հոտառությունը, նաև հատուկ մասնագիտական վարժեցումը այս տասնյակ շներից յուրաքանչյուրին դարձրել են անփոխարինելի` ինչպես մարդկային կյանքեր փրկելու, այնպես էլ հանցագործությունների բացահայտումների ժամանակ։
Արգելված նյութեր, թմրանյութ կամ զենք որոնող, հետախույզ… Ոստիկանության շնավարժարանի տասնյակ շներին ավելացավ տարբեր հմտություններ ունեցող յոթ շուն, որոնցից մեկն էլ Կատրինն է։ Անցած տարի շնավարժարանը համալրվել է Ռուսաստանից և Բելառուսից բերված նոր շնատեսակներով։
Նախարարությունը շարունակում է համակարգի ծառայությունների բարեփոխումները՝ արդիականացնելով և զարգացնելով ստորաբաժանումների կարողություններն ու հնարավորությունները։ Ոստիկանության պետական պահպանության գլխավոր վարչության շնավարժարանն էլ այդ շարքում է։
Ի դեպ, ՆԳ նախարարությունը նախատեսում է բարելավել այս ծառայությունն ինչպես ոստիկանական, այնպես էլ փրկարար շների կարողությունների, հնարավորությունների զարգացման ու բուծման ուղղությամբ»:
--00—ԼՀ