ԵՐԵՎԱՆ, ԱՊՐԻԼԻ 12, 24News
ԵՄ խորհուրդն ապրիլի 12-ին հայտարարել է անդամ պետություններում ԵՄ պատժամիջոցների խախտման կամ շրջանցման համար պատժի նվազագույն կանոնների վերջնական հաստատման մասին:
«Որոշակի գործողություններ այժմ կհամարվեն քրեական հանցագործություններ բոլոր անդամ պետություններում, օրինակ՝ օգնությունը ուղևորության արգելքի շրջանցման գործում, պատժամիջոցների ենթակա ապրանքների առևտուրը կամ արգելված ֆինանսական գործունեության իրականացումը: Այդ հանցագործությունների հրահրումը և օժանդակումը նույնպես կարող են պատժելի լինել»,- «Արմենպրես»-ի փոխանցմամբ՝ ԵՄ խորհրդի հաղորդագրությունն է մեջբերել «Ինտերֆաքս» գործակալությունը:
Փաստաթղթում բերված պարզաբանումներում, մասնավորապես, ասված է, որ «պատժամիջոցների կանխամտածված խախտումը պետք է ենթադրի բանտարկություն՝ որպես առավելագույն պատիժ»։ ԵՄ սահմանափակող միջոցները խախտողները կարող են ենթարկվել լրացուցիչ տուգանքների։
Իրավական անձինք նույնպես կարող են պատասխանատվության ենթարկվել, եթե հանցագործությունը կատարել է կազմակերպությունում ղեկավար պաշտոն զբաղեցնող անձը։ Այդ դեպքերում պատժամիջոցները կարող են ներառել տնտեսական գործունեության իրականացման թույլտվությունների չեղարկում։
Դիրեկտիվն ուժի մեջ կմտնի ԵՄ «Պաշտոնական հանդեսում» հրապարակվելու 12-րդ օրը։ Անդամ պետությունները 12 ամիս կունենան՝ դիրեկտիվի դրույթներն իրենց ազգային օրենսդրության մեջ ներառելու համար:
--00—ԼՀ