ԵՐԵՎԱՆ, ԴԵԿՏԵՄԲԵՐԻ 12, 24News
Հայաստանից ադամանդի արտահանումը նոր ռեկորդներ է գրանցում։
Այս տարվա առաջին կիսամյակում այն արտահանման ցանկում երրորդ տեղում է։ Զիջում է միայն ոսկուն և ավտոմեքենաներին։ Քանի որ անհամեմատ փոքր ծավալի ադամանդ է մշակվում (վերամշակվում) Հայաստանում, կարելի է եզրակացնել, որ սա պարզապես ադամանդի վերաարտահանում է։ Տեղական շուկան դրանից էական օգուտներ չի ստանում։ Այս մասին հայտնում է hetq.am-ը։
Այս հոդվածում ներկայացել ենք նաև, թե որտեղից է գալիս ադամանդը և ուր է վերաարտահանվում։ Դրա հետ կապված՝ նաև ուրվագծվում է Հայաստանից ԱՄԷ փողերի արտահոսքի և ներհոսքի շղթան։
10 ամսում Հայաստանից 487 մլն դոլարի ադամանդ է արտահանվել
Մաքսային ծառայության տվյալներով՝ 2023 թվականի հունվար-հոկտեմբերին Հայաստանից արտահանվել է մոտ 3.7 մլն կարատ ադամանդ, որի ընդհանուր արժեքը կազմել է 487 մլն դոլար։ Առնվազն վերջին տասը տարում Հայաստանից այս ծավալի ադամանդ չի արտահանվել։
Նախորդ տարվա նույն ամիսների համեմատ Հայաստանից արտահանված ադամանդի քանակն աճել է 2 անգամ, արժեքը՝ 56%-ով։ Այլ խոսքով՝ արտահանվել է ավելի մեծ քանակի և միջինում ավելի էժան ադամանդ։
Սովորաբար, հայ ադամանդագործները հումքը ներմուծում են դրսից, վերամշակում և արտահանում։ Սակայն, նախորդ տարվանից «օրինաչափությունը» խախտվել է։ Արտահանվող ադամանդի գերակշիռ մասը պարզապես վերաարտահանվել է։
Այս տարվա հունվար-հոկտեմբերին Հայաստանից դուրս է եկել 3.7 մլն կարատ ադամանդ, փոխարենը Հայաստանում մշակվել է ընդամենը 141 հազար կարատ ադամանդ։ Այն էլ՝ հիմնականում տեղական շուկայի պահանջարկը բավարարելու համար։
Ադամանդագործները, որոնք հիմնականում անհատական պատվերներ են կատարում ու ոսկու շուկաներում փոքր ծավալի վաճառքներ, խուսափում են բացեիբաց խոսել ոլորտի վիճակի մասին։ Սակայն, նշում են, որ շուկայում այնպիսի «բում» չկա, որի արդյունքում տեղական ադամանդագործներն այնքան կտրուկ մեծացրած լինեին արտադրանքի ծավալները, որ արտահանումն աճեր։
Առավել մանրամասն՝ սկզբնաղբյուր կայքում։
--00--ԼՀ