«Բոլոր իրավունքներն ունեմ ասելու՝ Не верю»․Նաիրա Զոհրաբյանը դիտել է «Մել» ֆիլմը

ԵՐԵՎԱՆ, ՆՈՅԵՄԲԵՐԻ 11, 24News

1

«Անկեղծ ասած, որոշել էի չանդրադառնալ Մելինե, այլեւս Մել Դալուզյանի մասին ֆիլմի շուրջ հանրային էմոցիոնալ դիսկուրսին մինչ այն պահը, երբ կլիներ ֆիլմն ու իմ մասնագիտական կարծիքը կասեի»,- ֆեյսբուքյան էջում գրել է ԱԺ մարդու իրավունքների պաշտպանության հանձնաժողովի նախագահ Նաիրա Զոհրաբյանը։

«Բայց իշխանության տարբեր ներկայացուցիչների համառ պնդումները, թե ֆիլմը ոչ թե սեռափոխված անձի պատմությունն է, ինչի իրավունքը ֆիլմի ստեղծագործական խումբը ունի, այլ ընդամենը Եվրոպայի եռակի չեմպիոնի մասին է, մեղմ ասած՝ համոզիչ չեն, ու ազնիվ չեն։ Ուստի, ես բոլոր իրավունքներն ունեմ, ինչպես Ստանիսլավսկին, ասելու՝ Не верю։

Որովհետեւ խայտառակ դոպինգ սկանդալից հետո, Ծանրամարտի միջազգային ֆեդերացիան անժամկետ որակազրկել է Մել-Մելինե Դալուզյանին եւ պարտավորեցրել է վերադարձնել բոլոր մեդալներն ու հուշամեդալները, այդ թվում՝ Եվրոպայի եռակի չեմպիոնի մեդալները։ Բայց սա այս պատմության ամենատխուր էջը չէ։ Դալուզյանի դոպինգ սկանդալի պատճառով Հայաստանի ծանրամարտի հավաքականի մասնակցությունը 2020 թվականի Տոկիոյի օլիմպիական խաղերին մեծ հարցականի տակ է, եւ հայկական հավաքականի մասնակցությունը դեռ պետք է քննարկվի մայիսի 31-ին։

Էնպես որ, հզոր մարզիկի մասին լալահառաչ տեքստերը հավաքեք, փաթաթեք ու գցեք աղբարկղը։ Ես հասկանում եմ, որ քանի դեռ հանրային մանիպուլիացիան թրենդի մեջ է, ինչ ասես, ոնց ասես՝ կարող եք փաթեթավորել ու ինչ ասես, ոնց ասես՝ կարող եք ներկայացնել։ Բայց դե չհիշեցնեմ ինչ էր ասում ԱՄՆ նախագահ Լինքոլնը՝ խաբելու հնարավոր և անհնար ժամկետների մասին։
Ազնիվ լինելը, հավատացեք, ավելի արժանապատիվ է», - գրել է Նաիրա Զոհրաբյանը։

 

Տեսանյութեր

Live

Լրահոս