ԵՐԵՎԱՆ, ՀՈՒԼԻՍԻ 28, 24news
Ռուսական կողմը հաղորդել է, որ Ուկրաինայի զինված ուժերը կասետային զինամթերք են կիրառել, որի հետևանքով 1 կին է զոհվել, 1 տղամարդ՝ վիրավորվել։ Հարվածը հասցվել է Ուկրաինայում ռազմական գործողությունների ընթացքում մասամբ ՌԴ-ի վերահսկողության տակ գտնվող Զապորոժիեի մարզի Տոկմակ քաղաքում։ «Արմենպրես»-ի փոխանցմամբ՝ այս մասին իր Telegram ալիքում հայտնել է Զապորոժիեի մարզում ՌԴ-ի կողմից նշանակված նահանգապետի ժամանակավոր պաշտոնակատար Եվգենի Բալիցկին։
Նա նշել է, որ 3 հրթիռ է արձակվել քաղաքի մասնավոր հատվածի վրա։
«Հրթիռակոծության հետևանքով մասնավոր բնակելի տնային տնտեսությունում հրդեհ է բռնկվել, մեկ կին մահացել է։ Տեղի ևս մեկ բնակիչ վիրավորվել է, նա գտնվում է հիվանդանոցում, նրան անհրաժեշտ բուժօգնություն է ցուցաբերվում», - գրել է Բալիցկին։
Նրա խոսքով՝ երկրորդ հրթիռը խոցվել է հակաօդային պաշտպանության միջոցով։ Երրորդ արկը չի պայթել. սակրավորների խմբերը սկսել են դրա ոչնչացումը կառավարվող պայթեցման միջոցով։
Ըստ նահանգապետի պաշտոնակատարի՝ վնասվել է նաև գազատարը, իրավիճակը շարունակում է լարված մնալ։
Ուկրաինայի կողմից այս առնչությամբ մեկնաբանություն առայժմ չկա։
Սպիտակ տունը հուլիսի սկզբին հայտարարել էր, որ ԱՄՆ նախագահ Ջո Բայդենը Ուկրաինային կասետային զինամթերք մատակարարելու «դժվարին որոշում» է կայացրել։ Հուլիսի 13-ին ուկրաինացի գեներալ Ալեքսանդր Տառնավսկին հայտարարել էր, որ Կիևն արդեն ստացել է կասետային զինամթերք։
Ավելի քան 120 երկիր միացել է 2008 թ․-ին Օսլոյում ստորագրված կասետային զինամթերքի մասին կոնվենցիային, որն արգելում է կասետային ռումբերի օգտագործումը, մշակումը, արտադրությունը, պահեստավորումը և վաճառքը։ ԱՄՆ-ն այս կոնվենցիայի մասնակից երկիր չէ։
Այս զինամթերքը սովորաբար արձակում է մեծ թվով փոքր ռումբեր կամ մետաղի կտորներ, որոնք կարող են զգալի վնաս հասցնել մեծ տարածքում՝ սպառնալով խաղաղ բնակչությանը: Այս ռումբերի չպայթած մասերը վտանգ են ներկայացնում նաև հակամարտության ավարտից հետո:
--00—ԼՀ