«Երաշխավորել գեյ-շքերթներ անցկացնելու իրավունքը»` ԵԽԽՎ հանձնաժողովի կոչը Երևանին, Բաքվին, Թբիլիսիին

ԵՐԵՎԱՆ ՆՈՅԵՄԲԵՐԻ 30,  24News

եխխվ

ԵԽԽՎ Իրավահավասարության և խտրականության դեմ պայքարի հարցերի հանձնաժողովը մտահոգված է Հայաստանում, Ադրբեջանում եւ Վրաստանում ԼԳԲՏԻ անձանց վիճակով, և նշում է, որ «այդ մարդկանց իրավունքների բազմաթիվ խախտումներ են արձանագրվել կամ հաստատվել»։

Կոմիտեն հայտարարել է, որ այս երկրները պետք է ընդունեն արդյունավետ օրենսդրություն եւ «քաղաքականություն՝ ուղղված սեռական կողմնորոշման, գենդերային ինքնության, գենդերային ինքնադրսեւորման եւ սեռական հատկանիշների վրա հիմնված խտրականության դեմ գործողությունների ուժեղացմանը»:

Ողջունելով Վրաստանի առաջընթացը խտրականության դեմ պայքարում, ինչպես նաեւ Հայաստանում ներկա ժողովրդավարական անցման ընձեռած հնարավորությունները՝ խորհրդարանականները կոչ են արել Երեւանին, Բաքվին եւ Թբիլիսիին «երաշխավորել ԼԳԲՏԻ իրավունքների պաշտպանության հանրային միջոցառումների իրավունքը, ինչպիսիք են գեյ-շքերթները, ապահովել դրանց անվտանգ անցկացումը եւ մասնակիցներին պաշտպանել ցանկացած բռնությունից»:

Բանաձեւի ընդունված նախագիծը, որը հիմնված է Քրիստոֆ Լակրուայի պատրաստած զեկույցի վրա, կոչ է անում ընդունել վարքագծի կանոններ լրատվամիջոցների եւ խորհրդարանի անդամների համար, որոնք «արգելում են խարանող եւ խտրական մեկնաբանությունները եւ ատելության խոսքը ԼԳԲՏԻ անձանց նկատմամբ»:

Խորհրդարանականները նաեւ կոչ են արել հարավկովկասյան երեք պետություններին «բարելավել սեռական եւ վերարտադրողական առողջության ծառայությունների հասանելիությունը, ինչպես նաեւ սեռական ճանապարհով փոխանցվող հիվանդությունների վերաբերյալ տեղեկատվության եւ իրազեկության բարձրացումը՝ ներդնել ընթացակարգեր, որոնք թույլ կտան տրանսգենդերներին փոխել իրենց անունը եւ սեռը փաստաթղթերում, ամրապնդել համագործակցությունը քաղաքացիական հասարակության կազմակերպությունների հետ, որոնք աշխատում են պաշտպանելու մարդու իրավունքները՝ ներառյալ ԼԳԲՏԻ անձանց իրավունքները՝ միաժամանակ երաշխավորելով նրանց անկախությունը եւ պաշտպանել նրանց ու նրանց հետ աշխատող մարդկանց անվտանգությունը»:

Բանաձևի նախագիծը կքննարկվի ԵԽԽՎ հաջորդ լիագումար նիստում (2021թ. հունվարի 24-28):

--00--ԱԹ

Տեսանյութեր