ԵՐԵՎԱՆ, ՍԵՊՏԵՄԲԵՐԻ 9, 24News
Շանհայի համագործակցության կազմակերպության (ՇՀԿ) անդամ երկրների ղեկավարները Սամարղանդում կայանալիք գագաթնաժողովում իրանական կողմի պարտավորությունների հուշագիր կստորագրեն՝ կազմակերպությանն Իրանի անդամակցելու կապակցությամբ, որից հետո Իրանը կկատարի համապատասխան պարտավորությունները և կավարտի լիարժեք անդամություն ձեռք բերելու գործընթացը։.«Արմենպրես»-ի փոխանցմամբ, այս մասին ՏԱՍՍ-ին տված հարցազրույցում ասել է ՇՀԿ գլխավոր քարտուղար Չժան Մինը։
Նա նաեւ հավելել է, որ ակտիվորեն քննարկվում է այս միջազգային կազմակերպության անդամ երկրի կարգավիճակ ստանալու Բելառուսի դիմումը։
Նա հիշեցրել է, որ ՇՀԿ-ին Իրանի անդամակցության մասին որոշումն ընդունվել է 2021 թվականի գագաթնաժողովում, որից հետո սկսվել են անհրաժեշտ ընթացակարգերը։
Բացի Իրանից և Բելառուսից, շարունակել է Չժան Մինը, կան բազմաթիվ երկրներ, որոնք կցանկանան դառնալ ՇՀԿ անդամ, դիտորդ կամ երկխոսության գործընկեր։
«Նոր անդամների միանալով մենք հուսով ենք, որ ՇՀԿ-ն ավելի կարևոր դեր կխաղա տարածաշրջանային անվտանգության և կայունության պահպանման, ՇՀԿ անդամ երկրների ընդհանուր շահերի շրջանակի ընդլայնման, ինչպես նաև գլոբալ կառավարման համակարգի զարգացման գործում՝ արդար և ողջամիտ ուղղությամբ»,- ասել է գլխավոր քարտուղարը։
--00—ԻԴ