ԵՐԵՎԱՆ, ՀՈՒՆՎԱՐԻ 20, 24News
Պաշտպանի միջամտության արդյունքում քաղաքացուն հաջողվել է ստանալ բնակարանի օգտագործման իրավունքը։ Այս մասին տեղեկանում ենք ՀՀ ՄԻՊ ֆեյսբուքյան էջից։
Քաղաքացին դիմել է Մարդու իրավունքների պաշտպանի աշխատակազմ` խնդրելով պաշտպանի աջակցությունը։
Քաղաքացին տեղեկացրել է, որ միայնակ մայր է, և երեք տարի է՝ ժամանակավորապես բնակվում է մի բնակարանում, որը դեռևս Խորհրդային միության ժամանակ օգտագործման իրավունքով տրամադրվել է մի ընտանիքի, որն այդ բնակարանում բավականին երկար ժամանակ չի բնակվել:
Քաղաքացին բազմիցս դիմել է Տեղական ինքնակառավարման մարմին՝ բնակարանի օգտագործման իրավունքն իրեն հատկացնելու խնդրանքով, սակայն արդյունքի չի հասել:
Պաշտպանի աշխատակազմը գրություն է հասցեագրել Տեղական ինքնակառավարման մարմին՝ առաջարկելով քննարկել իրավունքի հատկացման հարցը, ինչպես նաև դիտարկել համայնքապետարանի ենթակայության հանրակացարաններից մեկում քաղաքացուն սենյակ հատկացնելու հարցը։
Պաշտպանի միջամտության արդյունքում՝ քաղաքացու բարձրացված հարցը դրական լուծում է ստացել, և նրան օգտագործման իրավունքով հատկացվել է այն բնակարանը, որտեղ բնակվում է։
--00—ՅՄ