ԵՐԵՎԱՆ, ՍԵՊՏԵՄԲԵՐԻ 23, 24News
ՀՀ ոստիկանության նախկին պետ Վլադիմիր Գասպարյանի նկատմամբ հարուցված քրեական գործը չի ուղարկվել Հատուկ քննչական ծառայություն։ Այս մասին 24News-ը տեղեկացավ ՀՀ դատախազության հանրային կապերի բաժնի պետ Արևիկ Խաչատրյանից։ Վերջինս նշեց նաև, որ գործը քննում է և շարունակելու է քննել Քննչական կոմիտեն։
Հիշեցնենք, որ նախկին ոստիկանապետը որպես մեղադրյալ է ներգրավվել ՀՀ պաշտպանության նախարարության առանձին պաշտոնատար անձանց կողմից պաշտոնեական դիրքը չարաշահելու դեպքի առթիվ։ Գործը վերաբերում է Վլադիմիր Գասպարյանի՝ ՀՀ ռազմական ոստիկանության պետի պաշտոնավարման տարիներին։
Հիշեցնենք նաև, որ ավելի վաղ ՔԿ-ն հայտարարել էր, որ քրեական գործը նախատեսվում է ուղարկել ՀՀ գլխավոր դատախազություն՝ նախաքննության իրականացումը ՀՀ հատուկ քննչական ծառայությանը հանձնարարելու համար: