ԵՐԵՎԱՆ, ԴԵԿՏՈՄԲԵՐ 12, 24News
Քիչ առաջ ՀՀ մշակույթի նախարարի պաշտոնակատար Լիլիթ Մակունցը հանդիպել է հացադուլ հայտարարած ռեժիսոր Հովհաննես Գալստյանին, հանդիպման արդյունքում Գալստյանը որոշել է դադարեցնել հացադուլը: Այս մասին ֆեյսբուքյան իր էջում տեղեկացրել է ՀՀ մշակույթի նախարարի խորհրդական Րաֆֆի Մովսիսյանը:
Մովսիսյանը հայտնել է, որ մանրամասները կներկայացվեն շուտով` ՀՀ մշակույթի նախարարության պաշտոնական հայտարարությամբ:
Հիշեցնենք, որ դեկտեմբերի 11-ին Լիլիթ Մակունցը հանդիպել էր հացադուլ հայտարարած Հովհաննես Գալստյանի հետ, իսկ այսօր նրան հացադուլը դադարեցնելու կոչ էր արել նաև Գարեգին Բ կաթողիկոսը։
Ռեժիսորի հացադուլի պատճառը 2019 թվականի փետրվարին նախատեսված «Տատիկիս վարսերը» հայ-բուլղարա-գերմանական կինոնախագծի՝ մեծ էկրան բարձրանալն է, որի ֆինանսավորումը վերջերս Ազգային կինոկենտրոնն արգելափակել էր: