Հայաստանի խորհրդարանի ղեկավար Արարատ Միրզոյանը այսօր՝ փետրվարի 22-ին, ընդունել է ՀՀ-ում Նիդերլանդների Թագավորության արտակարգ և լիազոր դեսպան Յոհաննես Դաումային (նստավայրը` Թբիլիսի):
Ողջունելով դեպանին՝ Ազգային ժողովի նախագահն ընդգծել է նրա գործուն դերակատարությունը երկու երկրների հարաբերությունների զարգացման հարցում:
ԵՐԵՎԱՆ, ՓԵՏՐՎԱՐ 22, 24News
Արարատ Միրզոյանը կարեւորել է երկկողմ շփումների ակտիվացումը, միջխորհրդարանական համագործակցության սերտացումն ու փորձի փոխանակումը:
Անդրադառնալով ներհայաստանյան վերջին զարգացումներին՝ օրենսդիր մարմնի ղեկավարը հույս է հայտնել, որ բոլոր այն երկրները, որոնք կարևորում են երիտասարդ ժողովրդավարությունները, մարդու իրավունքների և ազատությունների երաշխավորումն ու պաշտպանությունը, իրենց աջակցությունը կբերեն մեր երկրում տեղի ունեցող բարեփոխումներին:
Յոհաննես Դաուման, շնորհակալություն հայտնելով ջերմ ընդունելության համար, համոզմունք է հայտնել, որ համատեղ ջանքերի շնորհիվ հնարավոր կլինի առավել խորացնել և ընդլայնել երկկողմ հարաբերությունները` դրանք հասցնելով նոր մակարդակի:
Հանդիպման ընթացքում կողմերը փաստել են, որ փոխգործակցության զարգացման և ընդլայնման դեռևս չիրացված մեծ ներուժ կա մասնավորապես մշակութային, գիտակրթական ու առևտրատնտեսական ոլորտներում:
Զրուցակիցները մտքեր են փոխանակել նաև Հայաստանի քաղաքացիների համար ԵՄ մուտքի արտոնագրերի ազատականացման երկխոսությանը վերաբերող հարցերի ու Հայաստան-Եվրամիություն Համապարփակ եւ ընդլայնված գործընկերության համաձայնագրի վավերացման գործընթացի շուրջ: