ԵՐԵՎԱՆ, ՍԵՊՏԵՄԲԵՐԻ 13, 24News
Բռնցքամարտի աշխարհի իննակի չեմպիոն, հայ մարզիկ Վիկ (Վախթանգ) Դարչինյանը Երևանի ավագանու ընտրություններին սատարելու է «Ժողովրդավարական համախմբում» կուսակցության նախագահ Սուրեն Պետրոսյանին: Այս մասին Aysor.am-ի հետ զրույցում ասաց բռնցքամարտիկը:
«Ես գրանցված եմ Վանաձոր քաղաքում, այդ պատճառով չեմ կարող մասնակցել ընտրություններին: Սակայն սատարելու եմ Սուրեն Պետրոսյանին: Ես հիմնականում հայրենիքում չեմ լինում, դրսում եմ, դրա համար շատերին չեմ ճանաչում: Սուրենին անձամբ ճանաչում եմ, շատ կրթված, լավ տղա է: Հաճելի է նրա հետ շփվելը, զրուցելը: Ես քաղաքականության մեջ չկամ, ընտրությունների օրն էլ այստեղ չեմ լինի, բայց կասեմ, որ Սուրեն Պետրոսյանը վստահելի անձնավորություն է: Շատ կուզենամ՝ նրան տեսնել քաղաքապետի պաշտոնին: Շատ կրթված, խելքով տղա է, վստահելի անձ է: Կուզենամ խելքով տղա լինի մեր քաղաքապետը», - նշեց Դարչինյանը:
Բռնցքամարտիկը հավելեց նաև, որ քաղաքապետի ընտրությունները բոլորի համար էլ կարևոր են և ինքն էլ բացառություն չէ. «Ճիշտ է՝ լավ փոփոխություններ տեսել ենք, կան, բայց քիչ կանգառներ կան Երևանում ու կցանկանայի, որ դրանք ավելացվեն: Աղտոտվածության հարցն էլ է շատ կարևոր: Հուսով եմ՝ նոր քաղաքապետը դրանց ուշադրություն կդարձնի»:
--00—ՍՊ