ԵՐԵՎԱՆ, ՄԱՐՏԻ 27, 24News
Գիշերը Ռուսաստանի Բելգորոդի մարզը հերթական անգամ ենթարկվել է գնդակոծության։ Մարզի երկնքում խոցվել է 18 օդային թիրախ։ «Արմենպրես»-ի փոխանցմամբ՝ այս մասին իր Telegram ալիքում գրել է Բելգորոդի նահանգապետ Վյաչեսլավ Գլադկովը։
Ըստ նրա՝ 1 տղամարդ բեկորային վնասվածքներ է ստացել։ Վնասվել են նաև մի քանի տներ և ավտոմեքենաներ։
Գնդակոծության մասին հաղորդագրություն է տարածել նաև ՌԴ պաշտպանության նախարարությունը։ Ըստ գերատեսչության՝ ուկրաինական կողմը RM-70 Vampire համազարկային կրակի ռեակտիվ համակարգից արձակել է 18 հրթիռ, որոնք խոցվել են հակաօդային պաշտպանության համակարգերի կողմից։
Իր հերթին Ուկրաինայի զինված ուժերի գլխավոր շտաբը հայտնել է, որ գիշերը խոցվել են ռուսական բանակի կողմից արձակված 13 կամիկաձե անօդաչուներից տասը։ ԱԹՍ-ների հարվածներն ուղղված են եղել Սումիի, Խարկովի և Պոլտավայի մարզերին։
Խարկովի մարզում, ըստ տեղի իշխանությունների, ԱԹՍ-ներից մեկը հարվածել է Իզյում քաղաքի քաղաքացիական ենթակառուցվածքին, մասամբ փլուզվել է գիմնազիայի շենքը, վնասվել են դրա մերձակայքում գտնվող բնակելի տները։ 1 տղամարդ վիրավորվել է։
--00—ԼՀ