ԵՐԵՎԱՆ, ՄԱՐՏԻ 16, 24News
ՌԴ նախագահական ընտրություններում ՀԱՊԿ Խորհրդարանական վեհաժողովի (ԽՎ) դիտորդական առաքելության կազմում Հայաստանի ներկայացուցիչներ չկան։ Այս մասին լրագրողներին հայտնել է առաքելության ներկայացուցիչը, փոխանցում է ՏԱՍՍ-ը։
«Ոչ, ցավոք, ոչ»,- ասել է նա՝ պատասխանելով ՏԱՍՍ-ի համապատասխան հարցին։
Ավելի վաղ վարչապետ Նիկոլ Փաշինյանը հայտարարել էր, որ Երևանը դուրս կգա ՀԱՊԿ-ից, եթե այս կառույցը չկատարի իր պարտավորությունները և չճանաչի իր պատասխանատվության գոտին։ ՌԴ ԱԳՆ պաշտոնական ներկայացուցիչ Մարիա Զախարովան իր հերթին նշել է, որ Մոսկվան անհանգստացած է ՀԱՊԿ-ի նկատմամբ Հայաստանի ղեկավարության վերջնագրով և վիրավորական հռետորաբանությամբ։
Նշենք, որ ՌԴ նախագահական ընտրությունները տեղի կունենան մարտի 15-17-ը։ Առաջին անգամ դրանք անցկացվում են երեք օրվա ընթացքում և հեռավար էլեկտրոնային քվեարկության միջոցով: Պետության ղեկավարի պաշտոնին հավակնում են չորս թեկնածուներ՝ Վլադիմիր Պուտինը, Վլադիսլավ Դավանկովը, Լեոնիդ Սլուցկին և Նիկոլայ Խարիտոնովը։
--00—ՅՄ