ԵՐԵՎԱՆ, ՀՈԿՏԵՄԲԵՐԻ 12, 24News
Սամվել Կարապետյանի նախաձեռնությամբ «Տաշիր» բարեգործական հիմնադրամը Հայաստանում հերթական 3 մլն ԱՄՆ դոլարն է հատկացրել մարդասիրական ու սոցիալական ծրագրերի իրագործման համար:
«Մենք բազմակողմանի աջակցություն ենք ցուցաբերել, ցուցաբերում եւ շարունակելու ենք ցուցաբերել հայ ժողովրդին հատկապես այս դժվարին ժամանակներում։ Հավատում եմ, որ ի վերջո կկարողանանք ապահովել բոլոր պայմանները հայոց հողի խաղաղության ու բարգավաճման համար», – ընդգծել է Սամվել Կարապետյանը:
Արցախի հայերի ճակատագիրը մշտապես «Տաշիր» բարեգործական հիմնադրամի ուշադրության կենտրոնում է։ Դրա վառ օրինակներից է 2013 թվականին Ստեփանակերտում կառուցված աննախադեպ բժշկական կենտրոնը, որը հնարավորություն ունի տեխնոլոգիապես բարձր որակի, համաշխարհային առաջատար կլինիկաների մակարդակի բժշկական օգնություն տրամադրել հանրապետության բնակչությանը։ 2017թ. հունվարին բազմազավակ ընտանիքների աջակցության տրամադրման ծրագրի շրջանակում Արայիկ Հարությունյանը, ով այն ժամանակ Արցախի վարչապետն էր, նշում էր. «Սամվել Կարապետյանը համարվում է մեր ժամանակների հայ բարեգործության ամենամեծ ներկայացուցիչներից, ով մշտապես ապրում է հայրենիքի և ընդհանրապես հայ ժողովրդի հոգսերով»:
Սեպտեմբերի 27-ի վաղ առավոտյան Ադրբեջանը, խախտելով բոլոր միջազգային պարտավորվածությունները, թուրքական բանակի և Մերձավոր Արևելքից բերված ահաբեկիչների անմիջական մասնակցությամբ հարձակում է գործել Արցախի ուղղությամբ։ Այդ ընթացքում բազմիցս հրետակոծվել են թե՛ Արցախի և թե՛ Հայաստանի բնակավայրերը, խաղաղ բնակչության շրջանում կան բազմաթիվ զոհեր ու վիրավորներ, ավերվել են տասնյակ շինություններ, ահռելի վնաս է հասցվել քաղաքացիական ենթակառուցվածքներին։
Հայկական Զինված ուժերը հերոսական ու համառ մարտեր են մղում հակառակորդի դեմ՝ պատճառելով նրան կենդանի ուժի և տեխնիկայի ծանրագույն կորուստներ։
--00—ՄՀ